வாடல் நோய்: ப்யூசேரியம் ஆக்ஸிஸ்போரம் வகை வாசின்பெக்டம்

அறிகுறிகள்

• செடியின் எல்லா வளர்ச்சி நிலைகளிலும் இந்நோய் ஏற்படுகிறது.
• இளஞ்செடியின் பாதிக்கபட்டால் விதையிலைகள் மஞ்சளாகவும், பழுப்பாகவும் மாறுவதுடன் இலைக்காம்புகளின் மீது பழுப்பு வளையம் காணப்படும். இவ்வாறான இளஞ்செடிகள் நாளடைவில் காய்ந்துவிடுகின்றன.
• வளர்ந்த செடியில் நோய் தொற்றினால் செடியின் அடிப்பாகத்தில் உள்ள முதிர்ந்த இலைகள் ஆரம்பத்தில் மஞ்சளாக மாறுகின்றன. பின்பு அவையாகவும் வாடித் தொங்கிவிடும்.
• முதலில் முதிர்ந்த இலைகளும் அதன் பின் இளம் இலைகளும் வாடி விடுகின்றன.
• வாடிய செடியை பிடுங்கிப் பார்த்தால் அவற்றின் வேர்கள் வளர்ச்சி குன்றியிருப்பது காணப்படும்.
• தண்டின் அடிப்பாகம் கருமை நிறத்தில் காணப்படுகின்றது. பட்டையை உரித்துப் பார்த்தால்  தண்டுப் பாகத்தில் கரு நிறக்கோடுகள் காணப்படுகின்றன.
• வாடிய செடியின் சாற்றக்குழாய்த் தொகுதியைப் பூசண இழைகள் வளர்ந்து அடைத்துவிடுகின்றன. எனவே பயிருணவுச் சத்துக்கள், நீர் ஆகியவை வேர்ப்பாகத்திலிருந்து மேல் நோக்கி எடுத்துச் செல்லுதல் தடைபடுகின்றது.

கட்டுப்பாடு

• தண்ணீர் நன்றாக வடியும்படி செய்யவேண்டும்.
• மூன்று - நான்கு வருடங்களுக்கு ஒரு முறை பயிர் சுழற்சி செய்யவேண்டும்.
• விதையை 4 கிராம் டிரைக்கோடெர்மா விரிடி என்ற அளவில் ஒரு கிலோ விதைக்கு நேர்த்தி செய்யலாம்.
• பாதிக்கப்பட்ட செடியைப் பிடுங்கி எறியவேண்டும்.
• 2.5 கிலோ டிரைக்கோடெர்மா விரிடியுடன் 50 கிலோ தொழுஉரத்துடன் கலந்து மண்ணில் போடவேண்டும்.
• மண்ணில் பொட்டாஷ் போடுவதால் நோயின் தாக்கம் குறைகிறது. பாஸ்பரஸ் மற்றும் நைட்ரஜன் இடுவதால் நோயின் தாக்கம் அதிகரிக்கிறது.