ஆக்டினோ மைக்கோசிஸ்

இந்நோயினைப் பற்றி

நோயின் தன்மை

இது நுண்ணுயிரியால் ஏற்படக்கூடக்கூடிய கறவைமாடுகளைத் தாக்கும் நோயாகும்.
இந்நோயினால் தாக்கப்பட்ட மாடுகளின் கீழ்த்தாடை மற்றும் அதனைச் சுற்றியுள்ள பகுதிகள் வீங்கி காணப்படும்.
இந்நோயின் தாக்குதலால் பாதிக்கப்பட்ட மாடுகள் தீவனம் எடுப்பது பாதிக்கப்படுகிறது.

நோய்க்கான காரணங்கள்

ஆக்டினோமைசிஸ் நோய் ஆக்டினோமைசிஸ் போவிஸ் எனும் நுண்ணுயிரியால் ஏற்படுகிறது.
இது தவிர கொரினிபேக்டீரியம் பையோஜீனஸ் மற்றும் ஸ்டெபைலோகாக்கஸ் எனும் நுண்ணுயிரிகளும் இந்நோயினை ஏற்படுத்துவதற்கு காரணமாக இருக்கின்றன.

நோய் பரவும் விதம்
இந்நோய் பொதுவாக 2-5 வயதான மாடுகளை அதிகம் பாதிக்கிறது. இந்நோயின் தாக்கம் பொதுவாக குறைவாகவே காணப்படுகிறது. நோயினால் பாதிக்கப்பட்ட மாடுகளிலிருந்து மற்ற மாடுகளுக்கு இந்நோய் பரவுவது மிகவும் குறைவு. சாதாரணமாக இந்நோய்க்கிருமி மாடுகளின் உடலில் இருக்கும். ஆனால் ஏதேனும் காயம், புண்கள் ஏற்படும் போது இந்நோய்க் கிருமி மாடுகளின் உடலில் சென்று நோயினை உண்டாக்குகிறது. குத்தும் தன்மையுடைய தீவனங்களால் மாடுகளின் வாயில் புண்கள் ஏற்பட்டு நோய் ஏற்பட வாய்ப்பு ஏற்படுகிறது. மாடுகளில் பல் முளைக்கும் போது அதன் வழியாக இந்நோய்க்கிருமி உட்சென்று நோயினை ஏற்படுத்தும். சாதாரணமாக,, நோயினால் பாதிக்கப்படாத மாடுகளின் குடலில் ஆக்டினோமைசிஸ் போவிஸ் கிருமி இருக்கும். ஆனால் மாடுகளின் குடலிலோ அல்லது சீரண மண்டலத்திலோ புண்கள் ஏற்படும் போது இந் நோய்க்கிருமிகள் அதன் வழியாக உட்சென்று இதர திசுக்களை ஊடுருவி நோயினை ஏற்படுத்துகிறது.

அறிகுறிகள்

இந்நோயினால் பாதிக்கப்பட்ட மாடுகளின் தாடையில் முதலில் வலியற்ற கெட்டியான வீக்கம் ஏற்படும்.
பிறகு இந்த வீக்கம் பெரியதாகி, அருகிலிருக்கும் எலும்புப் பகுதிகளைத் தாக்கி, அதில் ஓட்டை ஏற்படுத்தும்.
பாதிக்கப்பட்ட மாடுகளின் தாடைகள் முழுவதும் பாதிக்கப்படுவதால், மாடுகள் அசைபோடுவது தடுக்கப்பட்டு சீரணமும் பாதிக்கப்படுகிறது. இதனால் மாடுகளின் உடல் நலம் பாதிக்கப்படுகிறது.
தாடைப் பகுதியில் ஏற்படும் சீழ்க்கட்டிகள் உடைந்து தோல் வழியாக சீழ் வடியும்.
பாதிக்கப்பட்ட மாடுகளின் வாயினைப் பரிசோதிக்கும்போது பற்கள் இல்லாமல் இருக்கும் அல்லது பல் ஆடிக்கொண்டிருக்கும்.
பாதிக்கப்பட்ட மாடுகளின் வாயில் துர்நாற்றம் அடிக்கும்.
இவ்வாறு ஆடிக்கொண்டிருக்கும் பல்லால் மாடுகளின் வாயில் உமிழ்நீர் சுரப்பது அதிகமாகி, தீவனத்தினை விழுங்குவதும் பாதிக்கப்படுகிறது.
நாள்பட்ட நோய் தாக்குதலில், மாடுகளின் இதர எலும்புகளும் நோயினால் பாதிக்கப்படுகின்றன.
ஆனால் இந்நோயினால் தாடைக்கருகிலுள்ள நிணநீர் கட்டிகள் பாதிக்கப்படுவதில்லை. அதனால் நிணநீர் மூலம் இந்நோய் பரவுவதில்லை.

மேலாண்மை முறைகள்

கட்டுப்படுத்தும் முறைகள்
இந்நோய்க்கெதிராக தடுப்பூசி எதுவும் இல்லை. இந்நோயினால் பாதிக்கப்பட்ட மாடுகளை பண்ணையிலுள்ள இதர மாடுகளிடமிருந்து தனியாக பிரித்து பராமரிக்க வேண்டும். இந்நோய்க்கிருமிகளால் அசுத்தமடைந்த பொருட்களை உபயோகப்படுத்தாமல் அப்புறப்படுத்தவேண்டும். மேலும் நோயினால் பாதிக்கப்பட்ட மாடுகளை முறையாக அப்புறப்படுத்த வேண்டும். தகுதி வாய்ந்த கால்நடை மருத்துவரைக் கொண்டு பாதிக்கப்பட்ட மாடுகளுக்கு சிகிச்சை அளிக்கவேண்டும்.